បំណែកយានស្រាវជ្រាវភពព្រះអង្គាររុស្ស៊ី PHOBOS-GRUNT បានធ្លាក់ក្នុងមហាសមុទ្រប៉ាស៊ីហ្វិក នាវេលាម៉ោង១៧និង៤៥នាទីម៉ោងនៅរុស្ស៊ី ។ នេះជាសេចក្តីរាយការណ៍របស់ម៉ាស៊ីនឃោសនារុស្ស៊ីដែលដកស្រង់សម្តី របស់អ្នកទទួលខុសត្រូវម្នាក់នៃក្រសួងការពារប្រទេសរុស្ស៊ី។ ពេញមួយថ្ងៃពួកអ្នកវិទ្យាសាស្ត្រខិតខំកំណត់ពីកន្លែង និងពេល ម៉ោងនៃការធ្លាក់យានអវកាសនេះ ដើម្បីចៀសវាងកុំឱ្យវាធ្លាក់លើកន្លែងទាំងឡាយដែលមានមនុស្សរស់នៅ ។ កងកម្លាំងពិសេសនៃក្រសួងការពារប្រទេសរុស្ស៊ីបានត្រួតត្រាដំណាក់កាលចុងក្រោយ នៃការចាកចេញពីតារាវិថីនៃបំណែករបស់យាននេះ ។
ប្រការនោះអាចឱ្យគេព្យាករណ៍ បានច្បាស់ពីកន្លែង និងពេលម៉ោងនៃការធ្លាក់យាននេះ ។ អ្នកទទួលខុសត្រូវម្នាក់របស់ក្រសួងការពារប្រទេសរុស្ស៊ីបញ្ជាក់ថា បំណែកទាំងឡាយបានធ្លាក់ក្នុងមហាសមុទ្រប៉ាស៊ីហ្វិក នៅកន្លែងមួយចម្ងាយ១.២៥០គីឡូម៉ែត្រ ខាងកើតកោះវែលលីញតុន។ យាន PHOBOS-GRUNT ត្រូវបានបាញ់បង្ហោះកាលពីថ្ងៃទី៩ វិច្ឆិកា ត្រូវហោះឆ្ពោះទៅរកផ្កាយរណបមួយនៃភពព្រះអង្គារ ហើយយាននេះ ត្រូវប្រមូលទិន្នន័យទាំងឡាយពីផ្កាយរណបនោះក៏ប៉ុន្តែ យាននេះត្រូវបរាជ័យក្នុងពេលឆ្លងកាត់ទំនាញផែនដី ។
យាននោះមានតម្លៃ១៦៥លានដុល្លារ កំណត់ពីការងាករបស់រុស្ស៊ីឆ្ពោះមកស្រាវជ្រាវអវកាសវិញ បន្ទាប់ពីបោះបង់ចោលក្រោយបរាជ័យកាលពីខែវិច្ឆិកា ឆ្នាំ១៩៩៦ ក្នុងការបាញ់បញ្ជូនយានភពព្រះអង្គារ MARS-96 ដែលធ្លាក់ក្នុងមហាសមុទ្រប៉ាស៊ីហ្វិកដែរ ៕ដកស្រង់ពី: កោះសន្តិភាព ថ្ងៃទី១៦ ខែមករា ឆ្នាំ២០១២
ដោយ៖ ធីតាកោះ
សូមជួយ បញ្ចេញមតិ(comment) ប្រតិកម្ម ចែករំលែកបន្ត(share) នៅលើ Facebook ឬ twitter របស់អ្នកផង ។ ខ្មែរស្រឡាញ់ខ្មែរ...!!!
0 មតិយោបល់:
Post a Comment